纽咸呢个地方名系喺1965年,英国政府将伦敦同周边地区重划成大伦敦嘅时候先作出嚟嘅。当年政府将属于雅息士郡嘅韦斯咸 (意译“西村”) 同伊斯咸 (意译“东村”) 合并成一个新嘅区议会,就帮佢改咗个名做“新村”。

廿一世纪初,伦敦举办2012年夏季奥运,主场馆选址区内嘅史察福一带,令呢区大规模翻新。码头区轻铁喺区内多咗条支线,史察福火车站有有升级工程,重开埋西田百货,令史察福成为东伦敦嘅新枢纽。

纽咸系全英国最种族多元嘅地方[1]。当地人口约三十万,当中约四成系亚裔、三成系白人、三成系其他种族。纽咸区系全伦敦白人比例最低嘅地方,亦系全英国穆斯林比例第二高嘅地方,仅次于隔篱嘅塔村区[2]。

政治方面,由1965年置区到而家,工党一直系当地区议会嘅执政党。自2010年开始,工党更包办全区所有区议会议席,一党独大[3]。