引用系种修辞手法，运用名人讲过嘅说话，或名人嘅事、物、诗文、典故、寓言、成语、俗语、格言、谚语等，嚟支持作者嘅立场，以达到证明同加强自己所讲嘅理论，令到文章嘅内容更为充实[1]。引用系一种诉诸权威或大众嘅修辞法。利用一般人对于权威嘅崇拜同大众意见嘅尊重，以借此加强言论嘅真实性、说理性、表现力、说服力，借此收到言简意赅嘅表达效果。除此之外，引用修辞亦有节省文辞嘅功能，因为引用前人千锤百炼嘅文字，或大家比较熟悉嘅名言，胜过自己用十倍篇幅所能骲表达言论嘅效果。引用修辞依内容来源嘅出处分类，可以分为明引同暗引两种[2]。
明引系直接畀读者知道所引用嘅内容系出自边度，又分为全引、略引两种。全引系引用一句或几句，完全唔会修改任何字词；略引系引用一句或几句，但系会改少少字词。
暗引系引用嘅时候，唔指名出处。又分为全用、略用两种。全用系引用一句或几句，完全唔会修改任何字词；略用系引用一句或几句，但系会改少少字词。