J-pop喺广义上，可包括昭和初期受当时西方流行音乐影响而出现嘅歌谣曲，甚至系起源于明治时代嘅演歌；狭义上就指1980年代末期诞生嘅“J-pop”（或称JPOP）概念。“J-pop”系由1988年开播嘅音乐专门电台J-WAVE命名[1]，系当时为定义日本出产嘅流行音乐而创造出来嘅和制英语用词，来自英文“Japanese pop”嘅缩写；其后喺日本被广泛用来指受西方影响嘅现代音乐流派，主要包括大众流行、R&B、灵魂乐、摇滚乐、舞曲、嘻哈、流行电音等。此外，都有日本独自发展出来嘅J-pop分支，好似涩谷系同City pop[2][3]。
截至2020年，以J-pop为主嘅日本音乐产业仍然系世界第二大嘅音乐市场（包括实体唱片、数码音乐、音乐串流、版税）[4]，仅次于美国之后。凭借日本发展成熟嘅文化产业，现今嘅日本流行音乐同韩国流行音乐、华语流行音乐并列为喺亚洲具有指标性嘅流行音乐类别，系构成当今日本流行文化嘅重要元素，亦系推动佢发展嘅原动力之一。近年，由于日本嘅实体唱片销量减少，J-pop嘅整体市场规模呈缩小趋势[5]。亦有评论指出，同周边亚洲国家相比，日本嘅音乐业界仍然依赖实体唱片作为主要发行媒介，销售方式过渡到数码音乐同音乐串流嘅进度比较缓慢。