哈利波特自细父母双亡，同佢嘅姨妈姨丈同表哥住，但𠮶家人一直对哈利唔好，仲唔想畀哈利入读霍格华兹魔法与巫术学院。喺鲁霸·海格嘅帮助下，哈利离开佢姨丈屋企，去到霍格华兹，畀分类帽分咗去葛来分多学院度。之后哈利入埋葛来分多学院嘅魁地奇代表队，做搜捕手。
有一日，哈利同荣恩·卫斯理同妙丽·格兰杰喺唔畀学生入嘅地方发现咗一只三头巨犬，而三头巨犬好似守护紧一啲嘢。之后佢哋三个知道𠮶样嘢系一嚿魔法石，佢哋再次返去三头巨犬度，喺通过一连串嘅难关之后，哈利发现想攞到魔法石嘅系教黑魔法防御术嘅奎若教授，而佛地魔就依附喺奎若个头度。佛地魔想通过奎若攞到魔法石，但系唔成功，而奎若就化成沙尘死咗。之后邓不利多校长同醒番嘅哈利讲，嚿魔法石已经销毁咗。