西湾河站（粤拼：sai1 waan1 ho2 zaam6（“河”读“ho2”）；英文：Sai Wan Ho Station）系港铁港岛线嘅一个铁路车站，喺香港东区西湾河筲箕湾道地底，上下层夹埋有2个侧式月台，并装咗月台幕门。

西湾河站设有一个车站大堂，成个大堂喺西湾河文娱中心地底。大堂内设有升降机往返月台，并有扶手电梯往返出口及月台。

西湾河站嘅车站商店数目唔多，设有4个商店，包括7-Eleven便利店、鸿福堂健康快线、美心西饼及快图美畀乘客买嘢同及晒相。此外，该站内设有恒生银行及中银香港嘅自动柜员机畀乘客提款，并有自动售卖机畀乘客买嘢饮。

西湾河站启用初期，当时由于附近只有欣景花园等屋苑，所以用呢个站嘅人流较少。但随住苏豪东、香港电影资料馆同海天广场等相继落成，令呢个站嘅人流有所上升。

喺1970年代设计港岛线嘅走线时，西湾河站原本定线喺较近山腰嘅西湾河街地底，不过最终定位喺筲箕湾道而家嘅位置，以配合1980年代初东区嘅大型填海工程。该站喺1985年5月31号启用。

喺2008年，本站月台墙壁下嘅纸皮石进行咗重铺工程。