reika

by Reika 之前SQUARE ENIX喺TGS公布咗《FINAL FANTASY XIV: A Realm Reborn》嘅新trailer，大家都预咗FF14即将完结，终于今日系时候讲拜拜嘞，SE正式宣布玩咗两年嘅MMORPG《FFXIV》终止服务，官方仲好有人情味整咗段叫“End of an Era”嘅结局片比大家留个纪念。呢段影片讲述“第七灵灾”嘅最后时刻，艾奥杰亚时代正式终结。影片好有末日feel，亦有千军万马嘅瑰丽战争场面，连音乐都特别悲壮，不过唔驶伤感，正如片尾话斋：“But every end marks a new beginning…”，《FFXIV: A Realm Reborn》将会紧接剧情展开，到时江湖再见啦！

“多啦A梦诞生前100年祭”嚟香港啦！ by Reika 哗哗哗哗！你睇，叮当，呀，唔系，多啦A梦嚟啦！呢个号称香港史上最大规模嘅多啦A梦展览，将会喺8月14日至9月16日于海港城举行！喂！点解得对眼？因为多啦A梦系2112年出世o架嘛，今次系庆祝佢诞生前倒数100年，支波板糖同夫拉圈加百宝袋都未有啰！ 官方Facebook啱啱公布消息，暂时只知时间地点，同埋有得睇最新发布嘅相，多啦A梦对眼变咗100周年嘅眼镜，加埋Facebook之前发布嘅两副图，全部都系新设计，令人好想买晒佢嘅一系列产品珍藏呀！不过最担心系，咁我会唔会见唔倒大雄、静儿、牙刷仔同埋技安佢哋o架？