常陆宫正仁亲王（日文：常陆宫 正仁亲王／ひたちのみや まさひとしんのう Hitachinomiya masahitoshinnō；1935年11月28号—）系日本天皇第三顺位继承人，上皇明仁细佬，常陆宫当主，乳名义宫，尊称系“正仁亲王殿下”，花名“火星”。

佢响东京都皇居产殿出世，细细个曾经有过小儿麻痹症。响第二次世界大战之后，佢好努力咁改善皇室古老、守旧嘅形像，因而得到“火星”呢个花名。1958年响学习院大学理学部化学科毕业，之后转到东京大学理学研究科读动物学。

响1964年（昭和三十九年），佢同津轻华子结婚，同埋设立常陆宫。佢同华子妃冇仔女。

佢一直都响到研究紧癌症嘅细胞分裂同埋海洋生物，响1969年加入日本癌症研究会做研究人员。佢分别响1997年攞到美国佐治·华盛顿大学荣誉博士、响2001年攞到明尼苏达大学荣誉博士、德国癌症研究协会荣誉会员等等。佢重系好多协会嘅荣誉总裁[2]。

正仁系第三顺位（即最后一位）。而如果今上天皇德仁死咗，当然会依照继承顺位咁传（即系文仁→悠仁→正仁）；但系如果德仁只系病得好紧要，未瓜得住，咁就会先由第一顺位继承人文仁摄政，如果文仁都有事就会畀正仁摄政，但就唔会畀悠仁。