《想怀孕 你要知：多囊卵巢综合症》

咩系多囊卵巢综合症？

多囊卵巢综合症系一种内分泌疾病，同雄激素水平有关，最常见于20至40岁正值生育期嘅女性，而且会影响怀孕。一般女性喺月经初期大约有10个卵泡，当中只有一个会形成主要卵泡排出；多囊性卵巢综合症患者嘅卵巢就系有多个细小但不成熟嘅卵泡，形成不排卵导致不孕。

多囊性卵巢综合症有咩症状？

最常见嘅症状包括经期异常，月经周期通常超过35日。或因为雄激素旺盛，而出现唇毛、体毛、青春痘增多。仲会突然肥胖，皮肤变黑，甚至出现脱发。

患者要点注意饮食？

呢种内分泌疾病同代谢，荷尔蒙嘅平衡息息相关。一般饮食原则应选择低升糖指数、低炭水化合物、高纤、非加工食品。多食富纤维食物，例如五谷类，豆类，水果等。大豆更可以令胰岛素、胰岛素抵抗、血糖显著下降，有助对抗荷尔蒙不衡。饱和脂肪酸食品，例如肥肉、各种家禽家畜嘅皮、全脂奶、油炸食物等容易导致胰岛素抵抗，令多囊性卵巢综合症恶化，所以都应少食。

另外，食用肌醇亦有助改善多囊性卵巢综合症。肌醇能够增加胰岛素嘅敏感性，令胰脏减少分泌胰岛素，及卵巢减少雄激素。由于雄激素会抑制卵泡发育，所以雄激素减低咗，卵子更容易成熟，卵巢就可以正常排卵。