亚比安Nimbus系英国亚比安出嘅一款轻量版中置引擎巴士及客车底盘。
亚比安Nimbus系喺1955年嘅苏格兰车展首次亮相，有啲设计同当时嘅亚比安Claymore货车类似。最初期Nimbus嘅代号系MR9N，采用亚比安原厂嘅EN219引擎、四前速棍波同埋尾轴；1958年代号NS3N嘅Nimbus推出，改用亚比安EN250引擎、David Brown四前速棍波同埋柯士甸（英国汽车公司属下）车轴；1960年Nimbus再被改良成NS3AN，采用亚比安五或六前速棍波，而源自英国汽车公司嘅车轴亦升咗级。
亚比安Nimbus除咗喺英国卖之外，亦有被出口到多个国，包括澳洲、丹麦同埋锡兰等等，其中一架去咗澳洲嘅亚比安Nimbus被加长至27呎（其余嘅都系长23呎）。
亚比安Nimbus喺1965年停产，喺十年内总共出咗三百几架。