老早个棉花是市花|黄道婆_新浪财经_新浪网

文/许德华

大家侪晓得，现在上海个市花是白玉兰，是40年前上海市民投票选出来嗰。当时候选花卉包括月季、桃花、海棠、石榴、杜鹃、白玉兰等，收到个10万多张选票里，白玉兰得票最多，其次是桃花。1986年，经过上海市人民代表大会常务委员会决议，白玉兰正式成为上海市花。

有趣个是，95年前，上海个市花是做被头衣裳个棉花，也是老百姓投票选出来嗰。当时选票一共发出去3万张，收回来超过1.7万张，棉花得票5496张，名列第一。1929年4月29日上海《申报》载：棉花当选为市花。

葛末当时为啥是棉花当选市花而勿是牡丹花呢？《申报》从棉花个特性、棉花个功用、棉纺织业对上海经济个重要作用作了解释。其实，棉花搭仔上海个渊源古来有之。搿就要讲起黄道婆、一个松江老妈妈个故事。

黄道婆从小是个童养媳妇，生活了七百多年前个松江府乌泥泾（今徐汇区华泾镇）。埃歇辰光是宋末元初，乌泥泾开始种棉花纺纱织布，但是缺技术，全靠手工去棉花籽搭仔搓棉线织布个生活邪气难做，交关做生活个小姑娘吃足苦头。看过沪剧《阿必达回娘家》个侪对里向个小姑娘邪气同情。后来，黄道婆流落到海南岛崖州，从当地黎族人手里学到了轧棉花籽、搓棉线、织布等一整套棉纺织加工技术。元朝元贞年间，黄道婆回到松江，教家乡个姐妹用新技术纺纱织布，去棉花籽快了，纺出来个纱多了，织出来个布平整了。黄道婆个所作所为受到乡民欢迎。当地妇女手工劳动个收入多了，家庭地位搭仔社会地位也提高了。明中叶以后，棉花已遍及江北及中州，不蚕而绵，不麻而布，利被天下，其益大哉。有谚语称：“买不尽松江布，收不尽魏塘纱。”黄道婆被后人尊称为“先棉”，松江地区世代相传个童谣里唱道：“黄婆婆，黄婆婆，教我纱，教我布，两只筒子两匹布。”

为了感念黄道婆传授技艺，上海民间为黄道婆立祠纪念，每年农历四月初六，纺纱织布个妇女侪要进行祭拜。清政府也将其祠祭纳入祀典，规定由地方官每年春秋两季主持崇祀仪式。到了20世纪初，人们依旧崇拜黄婆婆，1929年棉花当选为上海市花是有群众基础嗰。

1980年中国邮政发行个古代科学家纪念邮票里，黄道婆是唯一个女性。现在，上海辣徐梅路700号开辟了黄道婆纪念公园，内有黄道婆墓、纪念馆和棉纺实践基地，是上海一道美丽景观。